Ternera Gallega, Un pracer para os sentidos no Fórum Gastronómico Santiago 2010
A Indicación Xeográfica Protexida Ternera Gallega acudiu á cita coa gran festa da gastronomía atlántica, o Fórum Gastronómico 2010, no que están representados os produtos máis importantes da cociña galega, e que este ano tivo lugar por segunda vez en Galicia.
A Denominación celebrou un taller-degustación acompañada polo cociñeiro Javier Rodríguez Ponte “Taky”, campión español de cociñeiros no ano 2000 e de Galicia e actual xefe de cociña de Boketé. Unha breve presentación da IXP marcou o comezo da demostración culinaria na que se elaboraron oito pratos diferentes, avogando así polo aproveitamento integral da carne da Denominación na alta cociña.
Durante a hora que durou a demostración, Javier Rodríguez ensinou ao público asistente as posibilidades e aplicacións das diferentes pezas de carne da IXP utilizadas no taller, elaborando receitas evolucionadas nas que se combinaron a sabedoría da cociña popular de Galicia coas técnicas culinarias máis innovadoras. Ademais a demostración acompañouse cunha minuciosa explicación na que se presentaron os aspectos técnicos que inflúen nas características organolépticas da carne e na percepción do comensal, tales como o tipo de corte, a maduración óptima ou as temperaturas de cocción e servizo.
Ademais desta actividade, a Denominación participou tamén no stand institucional da Xunta de Galicia xunto con
outros produtos galegos con indicativo de calidade, ademais de realizar varios talleres nos que combinaron a exposición e explicación das calidades da súa carne coa degustación que ofreceu ao público asistente.
As receitas de Ternera Gallega
Empregando, como materia prima, cortes orixinais de Ternera Gallega, o cociñeiro Javier Rodríguez Ponte “Taky”, elaborou oito receitas diferentes con cadanseu uso culinario: tartar de Ternera Gallega con Pan de Broa e Queixo San Simón da Costa, tataky de Ternera Gallega con mollo de tomate seco e alfábega , caldo de Ternera Gallega co seu ravilio e allos tenros, canelón de Ternera Gallega con berenxena, avelás e aceite de trufa negra, falso solomillo de babilla á prancha, lomo de babilla asado e reposado con salteado de mazá e castañas, lingote de costela glaseado con ceboliñas ó mel e Cebreiro e dados de churrasco tenro con patacas douradas e chimi churri de encurtidos.