Carne de Vacún de Galicia, por primeira vez en Alimentaria 

O programa da IXP neste Salón internacional inclueu a realización de accións promocionais e informativas para dar a coñecer a carne certificada por Ternera Gallega e Vaca e Boi de Galicia.
Destacou a celebración de encontros comerciais coa distribución e cos profesionais do sector cárnico catalán.
No marco da XXII edición do Salón Internacional de Alimentación e Bebidas Alimentaria 2018, que se está a celebrar en Barcelona, a IXP Carne de Vacún de Galicia asistiu a este evento de referencia no sector da alimentación e desenvolveu un intenso programa de accións promocionais e informativas para dar a coñecer as características e potencial da carne amparada pola Denominación.
O Consello Regulador das IXPs de Carne de Vacún de Galicia, no que se integran Ternera Gallega e Vaca e Boi de Galicia, acudeu a esta cita formando parte do stand institucional da Xunta de Galicia, situado no sector Intercarn (pavillón 5) do recinto feiral.
O seu programa de actividades inclueu encontros cos profesionais do sector cárnico catalán  no que se compartiron puntos de vista sobre as IXPs, as novidades sobre a nova Denominación e a súa actividade.
No stand do MAPAMA
Ademais de estar presente en Intercarn, a IXP formou parte do programa institucional do Ministerio de Agricultura, Pesca, Alimentación e Medio Ambiente. O martes, ás 13h, o director de promoción do Consello Regulador, Luís Vázquez, ofrecerá unha masterclass sobre a Indicación Xeográfica Protexida e unha demostración dos cortes alternativos da carne.
Alimentaria permítelle á IXP e ás industrias rexistradas incrementar as súas oportunidades de negocio, tanto dentro como fóra das nosas fronteiras, presentando a nosa carne a un visitante moi cualificado, con poder de prescrición e compra. Á feira acoden cada ano uns 140.000 operadores do sector agroalimentario de ata 60 países.