As IXP Ternera Gallega e Vaca Galega / Boi Galego imparten un curso práctico na USC

A produción de carne de calidade e a seguridade alimentaria son os eixos centrais deste curso que organiza o Consello Regulador das IXP de Carne de Vacún de Galicia (Ternera Gallega e Vaca Galega / Boi Galego) xunto coa Universidade compostelá. Dirixido a unha trintena de profesores e investigadores, impartirase na facultade de Veterinaria mañá venres e permitirá aos participantes coñecer o traballo das IXP e a labor de control que realizan, tanto no campo e nas industrias como nos puntos de venda, para garantir en todo momento a trazabilidade da carne. Unha cita que servirá para potenciar a interdisciplinariedade e a colaboración entre diversas áreas de coñecemento, os centros do Campus Terra e o sector produtivo galego. 

Tras unha primeira clase sobre a razón de ser das Indicacións Xeográficas Protexidas, os participantes neste curso visitarán unha gandaría para coñecer o tipo de animais e razas admitidas nas dúas IXP e, tamén, o sistema de manexo tradicional propio dos gandeiros galegos. Persoal técnico das dúas denominacións explicaralles como realizan a labor de control dos animais admitidos e da súa alimentación. Tamén se dirixirán a unha industria cárnica para seguir o fío do sistema de control, que continúa na certificación e no correcto etiquetado da carne. E chegarán ata un punto de venda, onde os inspectores lles amosarán como supervisan o produto e a súa presentación ante os consumidores. 

De volta nas aulas, os responsables do laboratorio de Hixiene, Inspección e Control de Alimentos da facultade de Veterinaria ensinarán aos asistentes o seu programa de control de residuos e de trazabilidade da carne. E persoal do Consello Regulador explicaralles o traballo de promoción e a importancia das Indicacións Xeográficas no sector cárnico galego. Por último, van recibir unha masterclass sobre cortes alternativos co chef de Ternera Gallega, Javier Rodríguez Ponte, “Taky”, que lles falará das pezas de carne menos coñecidas e os seus usos culinarios. 

Ademais do Consello Regulador e a USC, na organización deste curso colaboran o Campus Terra, o Departamento de Anatomía, Produción Animal e Ciencias Clínicas Veterinarias e BioReDes.