Publicadas as axudas para os participantes nos programas de produción agroalimentaria

Publicadas as axudas para os participantes nos programas de produción agroalimentaria con calidade diferenciada
(xunta.es 05/01/2012) No DOG de hoxe concrétanse as bases e a convocatoria para o ano 2012 destas subvencións, cofinanciadas con fondos Feader da Unión Europea. Poderán beneficiarse os produtores que participen nos programas de produción e mellora dos produtos agroalimentarios galegos con calidade diferenciada.O Diario Oficial de Galicia (DOG) publica hoxe unha Orde da Consellería do Medio Rural e do Mar pola que se modifican as bases reguladoras das axudas aos produtores que participen nos programas de produción e mellora dos produtos agroalimentarios galegos con calidade diferenciada, e se procede á súa convocatoria para o ano 2012. Poderán ser beneficiarios destas axudas os produtores que participan nalgún dos programas de calidade diferenciada destes produtos definidos e recollidos no marco do Plan de desenvolvemento Rural (PDR) de Galicia 2007-2013, de acordo co Regulamento CE relativo á axuda ao desenvolvemento rural a través do Fondo Europeo Agrícola de Desenvolvemento Rural (Feader).
Gastos subvencionables
Serán subvencionables os gastos derivados da inscrición e as cotas de participación nun destes programas, incluíndo, no seu caso, os correspondentes a rexistro, control ou inspección necesarios para comprobar o cumprimento das especificacións do programa. A contía da axuda poderá chegar ata o 100% dos gastos subvencionables realizados, sen superar os 3.000 euros anuais por explotación, durante un período máximo de cinco anos. A Consellería e as entidades colaboradoras formalizarán convenios de colaboración nos que se regularán as condicións e obrigas asumidas por estas na xestión das axudas habilitadas a través desta Orde.
O prazo de presentación de solicitudes para esta convocatoria finaliza o 15 de xuño de 2012.
Financiamento
As axudas reguladas nesta Orde financiaranse con cargo aos orzamentos da Consellería do Medio Rural e do Mar para 2012, cunha dotación de 747.965 euros. Este importe poderá incrementarse con remanentes adicionais, de acordo coas dispoñibilidades de crédito.
 

Ir al listado de noticias