Ternera Gallega, un pracer para os sentidos no Forum Gastronómico Girona 2011
A Indicación Xeográfica Protexida Ternera Gallega acodeu á cita dentro do programa de actividades que ofreceu a consellería do Medio Rural no que estiveron representados os produtos máis importantes da cociña galega, e que este ano se celebrou en Girona.
A IXP Ternera Gallega desenvolveu un show cooking da man do prestixioso cociñeiro galego Javier Rodríguez Ponte, Taky, acompañado da ponencia “Ternera Gallega un pracer para os sentidos” a cargo de Luis Vázquez, director de Relaciones Externas da Denominación de Calidade.
Ademais desta actividade, a Denominación participou tamén na caseta institucional da Xunta de Galicia xunto con outros produtos galegos con indicativo de calidade.
Tradición e modernidade na alta cociña
O taller dirixido fundamentalmente aos profesionais da restauración, críticos gastronômicos e comercializadores de carne. Tras unha breve presentación da IXP, o xefe de cociña de Boketé e campión de España de Cociñeiros no ano 2000, protagonizou unha nova demostración de cociña, onde o público tivo a oportunidade de asistir en directo á preparación e degustación de tres pratos a base de Ternera Gallega, que foron Tataki de Ternera Gallega, filete ao baleiro e xarrete estofado armonizados con outros productos con indicativo de calidade tales como viños das Denominacións de Orixe Valdeorras e Ribeira Sacra e acompañados de distintas preparacións da D.O. Pataca de Galicia como guarnición.
Ao longo da demostración, o público puido descubrir aqueles aspectos técnicos que inciden dunha maneira fundamental na calidade organoléptica da carne e a súa percepción por parte do comensal, tales como o tipo de corte, o grao de maduración óptimo ou as temperaturas de cocción e servizo.
O obxectivo desta nova iniciativa da IXP Ternera Gallega no marco do Fórum Gastronómico de Girona 2011 foi mostrar os novos usos culinarios de pezas que historicamente ocuparon postos de pouca relevancia na alta cociña. Trátase de valorizar todos os cortes da tenreira galega, elevándoos á primeira división da gastronomía, rompendo deste xeito tópicos comúns na cociña cotiá e mellorando o aproveitamento de determinadas pezas do vacún. Preténdese, seguindo a liña profesional de Javier Rodríguez, traballar un perfil culinario evolucionado, de vangarda, respectando a riqueza da cociña tradicional galega e utilizando produtos con selo de calidade e amparados polo distintivo de Ternera Gallega.