Ternera Gallega

O Consello Regulador participou na Mesa do Agro organizada por El Correo Gallego para afondar nas cuestións clave para o mantemento da actividade gandeira no rural e fixar poboación nel. Tratáronse aspectos como o relevo xeracional, a dispoñibilidade de terras, o acceso aos servizos ou a negociación dos prezos. O presidente das IXP, Jesús González, compartiu conversa co director de División Agrogandeira de CLUN, Ángel Palacios, o presidente de Unións Agrarias, Roberto García, e o director xeral de Gandería da Xunta, José Baldeiros.

A costela asada de Boi Galego acaparou os eloxios nun evento promocional dirixido aos sectores da restauración, da distribución e da prensa gastronómica de Madrid, que se celebrou no Mom Culinary Institute baixo a organización da Agacal e de Galicia Calidade. Ademais de destacar a excelencia e a orixe do vacún maior certificado, a cita permitiu incidir nas cualidades diferenciais de Ternera Gallega, que tamén formou parte das degustacións ofrecidas polo Grupo Nove en Pontevedra, dentro das actividades de Etiqueta Negra.

O sabor e a moleza da carne foron as características que máis destacaron as preto de 200 persoas que asistiron a unha degustación de Ternera Gallega Suprema en Jülich, no oeste de Alemaña. Un evento de promoción e divulgación dirixido aos consumidores finais do sector da carnizaría tradicional, co obxectivo de que eles mesmos comprobaran directamente a calidade do produto amparado.

Puideron degustar diferentes cortes á grella, o xeito máis sinxelo de apreciar as cualidades organolépticas da carne certificada sen máis aderezos. Pezas singulares como o vacío ou o corte redondo, ademais da croca e a tapa demostraron a calidade e a versatilidade de Ternera Gallega Suprema. 

Despois de asistir ao Congreso de Gastronomía de San Sebastian, esta semana o Consello Regulador está a promocionar as carnes certificadas no Gastronomic Forum Barcelona, que se celebra entre os días 3 e 5 na Cidade Condal. Unha cita que reúne a máis de 70 chefs con 50 estrelas Michelín e que supón un grande escaparate para amosar a calidade de Ternera Gallega e de Vaca Galega-Boi Galego, facendo fincapé na súa versatilidade na cociña e na importancia das etiquetas que permiten distinguilas doutras carnes sen Denominación.

A asociación de Denominacións de Orixe, Origen España, firmou un convenio de colaboración con Ecovalia, a organización profesional nacional da produción ecolóxica, co fin de promover un modelo agroalimentario sostible, de calidade e cun alto valor engadido. O acordo foi asinado en Madrid polo presidente de Origen España, Ángel Pacheco, e o presidente de Ecovalia, Álvaro Barrera, que fixaron un escenario de acción conxunta para impulsar a proxección nacional e internacional dos produtos de calidade diferenciada e ecolóxicos.
 
Pacheco indicou que ambas entidades “son baluartes do mantemento da biodiversidade e da defensa dos recursos naturais”. Tamén engadiu que “a sostibilidade está integrada na noción de Indicación Xeográfica, xa que a preservación dos recursos locais é vital para garantir o subministro duradeiro dos alimentos de calidade certificada”.
 
Con este acordo, as dúas asociacións fomentarán a proxección dos produtos con IXP e DOP e os ecolóxicos, sensibilizando aos consumidores sobre os seus beneficios e reforzando o papel do sector como motor do desenvolvemento rural. 

O DOG publicou a lista de explotacións inscritas que recibirán as subvencións aos seus gastos de marcaxe, correspondentes ás axudas solicitadas o pasado mes de maio para as novas incorporacións aos selos de calidade. Os beneficiarios teñen ata o 25 de novembro para presentar, na sede online da Xunta, a documentación requirida: a xustificación dos gastos e a solicitude de pagamento (anexo VI).

Como indica a listaxe publicada, Ternera Gallega é a IXP que conta con máis beneficiarios, con 370 explotacións e un valor total de preto de 74.000 euros. No caso da IXP Vaca Galega-Boi Galego, recibirán a axuda sete ganderías, cun importe concedido de algo máis de 1.800 euros.