Ternera Gallega

A carne certificada da IXP Ternera Gallega acompañou un ano máis aos consumidores nas  celebracións da campaña ‘Quere o teu mercado’, unha iniciativa europea que pon en valor as prazas de abastos e as compras de proximidade. En Ourense, xa son 10 edicións nas que colaborou a Indicación Xeográfica Protexida; achegando o produto amparado para ofrecer unha degustación e , tamén, receitarios con explicacións sobre as diferentes pezas do vacún e os seus usos culinarios a través de propostas gastronómicas moi variadas. 

A sede do Consello Regulador acolleu a XVIII Xornada Técnica para Responsables de Calidade de Fábricas de pensos Galis, que anualmente reúne a expertos e profesionais para abordar as cuestións e retos clave que afectan ao sector. Nesta edición, coa asistencia de preto de 80 persoas, o encontro tratou aspectos como a bioseguridade, a prevención da lexionelose, os controis de calidade ou as inspeccións.

A Xornada comezaba coa presentación por parte do director de Agafac (Asociación Galega de Fabricantes de Alimentos Compostos), Bruno Beade, quen deu paso á responsable do departamento Técnico da Asociación, Luisa Delgado, para explicar diferentes cuestións sobre a bioseguridade no transporte de materias primas e pensos. 

    • A IXP presenta a terceira tempada da súa Escola de Cociña, dispoñible na canle de Youtube da Denominación, con receitas innovadoras, consellos prácticos e gran variedade de pezas.
      
    • Ademais, a IXP Vaca Galega-Boi Galego inaugura os seus contidos culinarios destinados ás redes sociais con propostas que achegarán aos usuarios as cualidades específicas do vacún maior certificado.
      
    • O acto de estrea celebrouse na sede do Consello Regulador en Santiago de Compostela e contou coa participación dos catro chefs colaboradores, que ofreceron unha degustación dalgún dos pratos presentados.

A IXP Ternera Gallega e a IXP Vaca Galega-Boi Galego estiveron presentes na feira culinaria Tuttofood de Milán, celebrada entre o 11 e o 14 de maio, xunto con outros produtos autonómicos con denominación de orixe. Da man da Axencia Galega da Calidade Alimentaria, promocionáronse as carnes certificadas e ofrecéronse varias degustacións de Ternera Gallega Suprema e Boi Galego co fin de amosar ao público internacional a versatilidade do vacún galego e as súas características diferenciais.

Un ano máis, o 17 de maio conmemorouse tamén con deporte, coa XII edición da Carreira Camiño das Letras, celebrada en Santiago. Unha cita que conxuga actividade física, cultura e tradición, pero tamén gastronomía, xa que os corredores poden participar dunha degustación de Ternera Gallega ao rematar a proba. 

Con preto de 250 inscritos, a Carreira Camiño das Letras propuxo varias probas. A absoluta, de 15 quilómetros entre o Pico Sacro e a Cidade da Cultura, percorrendo o Camiño do Sueste. Tamén unha opción máis curta, de 5 quilómetros, no entorno do Gaiás e o Bosque de Galicia e varios circuítos para as categorías infantil e xuvenil. 

Preto de 30 persoas asistiron ao curso que o Consello Regulador impartiu no CIFP A Granxa, en Ponteareas, enmarcado no Grao Superior de Procesos e calidade na industria alimentaria. Unha sesión formativa que abordou os aspectos tecnolóxicos que afectan á calidade da carne certificada e as técnicas e consellos de preparación, corte e cociñado; ademais de tratar os procesos de certificación e rastrexabilidade en todas as fases da cadea.

Xunto co director de Promoción das IXP, Luis Vázquez, os alumnos e alumnas puideron analizar que significa o concepto de carne de calidade e que aspectos se deben valorar para poder definila así. Tanto as cualidades organolépticas, desde a cor, o sabor, a zumarencia ou a moleza, entre outras, como cuestións relativas á seguridade alimentaria, os sistemas produtivos e de manexo, a alimentación dos animais ou outros atributos de valor que veñen marcados pola orixe xeográfica ou as tradicións dos gandeiros e gandeiras.