Ternera Gallega

Ademais dos seminarios que Ternera Gallega desenvolve coas cadeas de distribución para ampliar a formación do seu persoal de carnizaría, a IXP tamén imparte estes cursos aos futuros chefs profesionais. Este luns, os alumnos do CIFP Compostela – estudantes dos cursos de Dirección de Cociña e de Servizos en restauración – puideron saber máis sobre a carne certificada e as súas posibilidades gastronómicas. 

Coñecer o produto, a súa calidade e de onde provén, destacando o traballo dos gandeiros e gandeiras inscritos, achega aos alumnos ao valor engadido que ofrece Ternera Gallega. Non só como unha carne mol e con sabor, ideal para as mellores receitas, senón tamén como garante do futuro do medio rural e da súa rendibilidade económica, social e ambiental. Unha conxunción de atributos que o Consello Regulador transmitiu aos estudantes, co obxectivo de que aposten pola carne certificada nas súas carreiras profesionais.

Como xa é tradición, a IXP acudiu un ano máis a Xantar, o Salón Internacional de Turismo Gastronómico, que se celebrou en Ourense entre o xoves e o domingo. A través dunha proposta de tapas, Ternera Gallega amosou a variedade das súas pezas, tanto para petiscos sinxelos, en cru ou con pouco cociñado, como para ideas máis elaboradas. 

A croca, a tapa da pa e o xarrete foron os cortes escollidos polo chef Ángel Parada. De primeiro, propuxo un prato rápido e fácil de preparar, pero orixinal e con moito sabor: un tataki con tomate seco. Para a prancha, optou por unha das pezas máis versátiles do vacún. A tapa da pa emprégase habitualmente para guisos ou asados, pero coa axeitada preparación previa é un corte perfecto para facer volta e volta, mol e zumarento. E como remate, o sabor máis potente púxoo un guiso de xarrete, servido como recheo dunha pan brioche.

O Consello Regulador participou na Mesa do Agro organizada por El Correo Gallego para afondar nas cuestións clave para o mantemento da actividade gandeira no rural e fixar poboación nel. Tratáronse aspectos como o relevo xeracional, a dispoñibilidade de terras, o acceso aos servizos ou a negociación dos prezos. O presidente das IXP, Jesús González, compartiu conversa co director de División Agrogandeira de CLUN, Ángel Palacios, o presidente de Unións Agrarias, Roberto García, e o director xeral de Gandería da Xunta, José Baldeiros.

A costela asada de Boi Galego acaparou os eloxios nun evento promocional dirixido aos sectores da restauración, da distribución e da prensa gastronómica de Madrid, que se celebrou no Mom Culinary Institute baixo a organización da Agacal e de Galicia Calidade. Ademais de destacar a excelencia e a orixe do vacún maior certificado, a cita permitiu incidir nas cualidades diferenciais de Ternera Gallega, que tamén formou parte das degustacións ofrecidas polo Grupo Nove en Pontevedra, dentro das actividades de Etiqueta Negra.

O sabor e a moleza da carne foron as características que máis destacaron as preto de 200 persoas que asistiron a unha degustación de Ternera Gallega Suprema en Jülich, no oeste de Alemaña. Un evento de promoción e divulgación dirixido aos consumidores finais do sector da carnizaría tradicional, co obxectivo de que eles mesmos comprobaran directamente a calidade do produto amparado.

Puideron degustar diferentes cortes á grella, o xeito máis sinxelo de apreciar as cualidades organolépticas da carne certificada sen máis aderezos. Pezas singulares como o vacío ou o corte redondo, ademais da croca e a tapa demostraron a calidade e a versatilidade de Ternera Gallega Suprema. 

Despois de asistir ao Congreso de Gastronomía de San Sebastian, esta semana o Consello Regulador está a promocionar as carnes certificadas no Gastronomic Forum Barcelona, que se celebra entre os días 3 e 5 na Cidade Condal. Unha cita que reúne a máis de 70 chefs con 50 estrelas Michelín e que supón un grande escaparate para amosar a calidade de Ternera Gallega e de Vaca Galega-Boi Galego, facendo fincapé na súa versatilidade na cociña e na importancia das etiquetas que permiten distinguilas doutras carnes sen Denominación.