DOP Torta del Casar toma o relevo de Ternera Gallega na presidencia de Origen España
O Consello Regulador de Torta del Casar asume a presidencia da asociación de selos de calidade Origen España. Así se aprobou na Asamblea xeral celebrada este martes en Madrid, na que tamén se renovaron os cargos da xunta directiva.
O presidente da DOP Torta del Casar, Ángel Pacheco, será o presidente da Asociación durante os próximos dous anos, prorrogables outros dous. Un mandato no que estará acompañado polos consellos reguladores de Jabugo, Sierra Mágina e Queso de Murcia e Queso de Murcia al Vino, nas vicepresidencias; mentres que o de Jijona e Turrón de Alicante ocupará a secretaría. O Consello Regulador das IXP de Carne de Vacún de Galicia asume agora o papel de tesoureiro, e Espárrago de Navarra, Calasparra, Faba Asturiana, Plátano de Canarias, Sobrasada de Mallorca, Vinagre de Jerez e Guijuelo toman as vogalías.
O presidente das IXP Ternera Gallega e Vaca Galega-Boi Galego, que presidiu tamén Origen España durante os últimos 6 anos, Jesús González, sinalou a honra de dirixir a asociación durante este tempo. “Asumín a presidencia apostando por un proxecto integrador, innovador e competitivo, e creo que alcanzamos os obxectivos marcados polos integrantes da xunta directiva saínte”.
González destacou que, nestes anos, Origen España gañou en visibilidade, peso e influencia, representando actualmente ao 90 % do produto agroalimentario nacional amparado polos selos IXP ou DOP.
Pola súa banda, Ángel Pacheco destacou que toma o relevo “dun excelente presidente, nun mandato no que a Asociación creceu notablemente en responsabilidades, liñas de traballo, número de asociados e representatividade”. E asume esta etapa á fronte de Origen España para “seguir traballando por todas as denominacións agroalimentarias españolas, defender os intereses de todos os territorios amparados e das poboacións que coa súa historia, traballo e esforzo ofrecen produtos recoñecidos cos selos de calidade diferenciada”.