Expóñense en Salimat as posibilidades gastronómicas do vacún galego certificado

O Salón de Alimentación do Atlántico, que se celebra en Silleda desde este xoves ata o domingo en paralelo á Semana Verde, acolleu un novo showcooking da IXP Ternera Gallega e da IXP Vaca Galega-Boi Galego. Os diferentes usos culinarios das pezas de vacún, tanto das coñecidas como dos cortes menos habituais, foron o eixo central da actividade, co chef Javier Rodríguez “Taky” na cociña e co director de Promoción do Consello Regulador, Luis Vázquez, a cargo da exposición.

As primeiros pratos tomaron como protagonista a carne de Ternera Gallega Suprema, aquela que procede de animais menores de 10 meses, alimentados do leite materno como mínimo ata os 7. Luis Vázquez explicou as características desta categoría comercial e das ganderías que a producen, destacando a importancia de fixarse nas súas etiquetas de cor rosa para recoñecela no mercado. Pola súa parte, “Taky” preparou unha peza habitual nas cociñas, o redondo, pero elaborada dun xeito pouco común; fíxoa estilo rosbif para presentala en láminas con salsa tártara.

Na prancha, traballou con carne de Ternera Gallega Suprema e de Vaca Galega, escollendo un corte que non se soe empregar neste tipo de cociñado: o filete de vacío. Cunha mesma peza de dúas tipoloxías de carne diferentes apreciáronse os contrastes organolépticos entre a tenreira e o vacún maior. O director de Promoción aproveitou para explicar o labor da IXP Vaca Galega-Boi Galego para poñer en valor o produto amparado, evitando enganos ao consumidor na mención á orixe deste tipo de carne. Tamén falou do sistema de control e rastrexabilidade que aplica o Consello Regulador nos seus dous selos de calidade.

Ademais, os asistentes puideron coñecer as mellores técnicas e consellos para sacarlle o máximo partido á carne certificada: a importancia do temperado, cando é apropiado salgar, a maduración ou o sentido do corte, entre outras cuestións. E como punto final, unha receita de maior tempo de cocción: un taco mexicano tipo "pibil" elaborado con guiso de agulla de Ternera Gallega Suprema. 

Salimat cumpre a súa 27 edición como foro destacado para os profesionais do ámbito agroalimentario do noroeste peninsular, con máis de 260 expositores e incrementando nun 22 % o número de compradores presentes respecto ao ano pasado. Os expositores poden amosar os seus produtos a 33 importadores e distribuidores alimentarios de ata 19 países.