As carnes certificadas despregan a súa calidade no Salón Gourmets en Madrid
Despois de acudir a Alimentaria Barcelona o mes pasado, a IXP Ternera Gallega e a IXP Vaca Galega-Boi Galego non faltaron á súa cita anual co Salón Gourmets, a feira gastronómica de produtos de alta gama, que se celebrou en Madrid entre o luns e este xoves 16 de abril. As denominacións de calidade do vacún galego participaron con tres showcookings aos que asistiron máis de 120 persoas, entre público profesional e consumidores. Dúas delas ofrecéronse o luns e o martes no stand da Consellería do Medio Rural e a terceira, o mércores, na Aula Gourmets da propia feira, nunha xornada dedicada á Cociña Atlántica e ao papel das mulleres na nosa gastronomía.
A cociñeira Begoña Vázquez, do restaurante O Regueiro da Cova (Verín), encargouse de expoñer a calidade das diferentes categorías comerciais da IXP a través de receitas clásicas pero cun toque innovador. Coa croca, e a súa punta, de Ternera Gallega Suprema, serviu un tartar co que encheu un panipuri. Na grella, preparou o filete de vacío e a bavette de Ternera Gallega, demostrando como pezas que se usan normalmente guisadas tamén se poden facer na prancha con fantástico resultado. Acompañounas, ademais, con crema da IXP Castaña de Galicia. Como prato final, presentou un canelón de xarrete de Ternera Gallega Suprema Ecolóxica, poñendo en valor esta categoría que conta con dobre certificación, a da IXP e a do CRAEGA.
Desde o stand da Consellería do Medio Rural
Begoña Vázquez puxo o broche final aos dous showcookings previos ofrecidos polos chefs expertos en vacún, Javier R. Ponte “Taky” do catering Boketé e Héctor López, do Restaurante España (Lugo) e actual presidente do grupo Nove. O luns, Taky escolleu a croca para preparar un semicarpaccio e o redondo para montar uns ravioli de rosbif. Na grella, enfrontou a tapa da pa de Ternera Gallega Suprema e a de Boi Galego Selección, co obxectivo de amosar as diferencias en sabor, cor e intensidade. E como Begoña Vázquez, rematou cun xarrete guisado e acompañado dun brioche.
Na xornada seguinte, Héctor López tamén quixo que o público comparase as carnes certificadas de vacún maior e de tenreira, ofrecendo un tartar de punta de contra de Ternera Gallega Suprema e outro de Boi Galego Selección; cada un co seu aliño diferente. Antes, abriu boca cun saboroso consomé de Boi Galego no que cada comensal cociñou unha lámina de punta de croca de Ternera Gallega. Na prancha, tamén optou pola peza de maior versatilidade: a tapa da pa. E rematou cunha tenra costela de Ternera Gallega, asada no forno de brasas durante máis de 10 horas.
Labor divulgativa e promocional
Xunto co contido culinario, estas demostracións de cociña dan a oportunidade de explicar ao público asistente como traballa cada IXP, os seus sistemas produtivos e o tipo de animais amparados, ademais da súa alimentación e o manexo que fan os gandeiros e gandeiras inscritos.
Unha parte fundamental consiste en trasladar o sistema de control e rastrexabilidade que garante a orixe e a calidade do produto e resaltar a importancia de fixarse na súa etiquetaxe para evitar confusións ou enganos. É o único xeito de asegurar que estamos a consumir a carne de Ternera Gallega ou de Vaca Galega-Boi Galego, sabendo tamén que elixir as carnes certificadas contribúe a manter vivo o medio rural e a facelo rendible.
Durante as catro xornadas do Salón Gourmets, o persoal do Consello Regulador tamén deu resposta ás necesidades informativas e de carácter comercial dos visitantes interesados no produto amparado.