Entrecosto ao dous, o primeiro prato da Escola de Cociña de Ternera Gallega

A terceira tempada da Escola de Cociña da IXP arranca esta semana cunha proposta sinxela e rápida, pero moi visual e perfecta para os amantes da carne. Despois da presentación oficial dos novos contidos audiovisuais de Ternera Gallega e de Vaca Galega-Boi Galego, as dúas Denominacións empezan a lanzar os primeiros vídeos, con ideas frescas, saborosas e fáciles de reproducir nas nosas cociñas.

Carne certificada de Ternera Gallega Suprema e un pouco de técnica. Non fai falla nada máis para preparar este entrecosto, rico e zumarento, tal e como nos ensina un dos grandes expertos do vacún, o cociñeiro Javier R. Ponte, “Taky”. Un vídeo co que, en menos de 10 minutos, aprenderemos os conceptos que afectan á moleza, aos zumes e ao sabor da carne; ademais dos mellores consellos para resaltar as súas cualidades organolépticas. 

Temperar a carne antes de cociñar, secala e canteala son algunhas das ideas que nos amosa Taky para conseguir o selado exterior desexado. E tamén nos aclara as dúbidas habituais que nos xorden cando facemos a carne de vacún á prancha, como cando salgar ou cantas voltas son necesarias. Técnicas sinxelas para lograr un entrecosto ben dourado, ao punto, mol e rico. 

O premiado tartar de Héctor López

A IXP Vaca Galega-Boi Galego tamén publica os seus primeiros reels puramente gastronómicos, da man do cociñeiro do restaurante España, Héctor López. Un gran coñecedor do vacún maior que nos propón facer o seu premiado steak tartar; neste caso, coa carne certificada de Vaca Galega. 

Unha receita fácil e rápida, pero con moito sabor e cun toque fresco e algo picante. Ademais, o chef aposta por una peza como a man de diante (ou centro de espalda), sen necesidade de recorrer ao lombo ou o solombo, que son os cortes habituais para este tipo de preparacións en cru. Un prato ideal para apreciar os sabores aromáticos e intensos propios do vacún maior certificado.