Ternera Gallega

O próximo 18 de maio remata o prazo para que os novos gandeiros inscritos nas IXP Ternera Gallega e Vaca Galego / Boi Galego soliciten as axudas aos gastos de marcaxe dos seus animais. O período subvencionable abrangue dende o 1 de maio do 2020 ata o pasado venres 30 de abril, polo que os produtores xa coñecen o importe definitivo para cubrir as solicitudes. Como ocorrera nas últimas convocatorias, deben superar os 50 €.

O Consello Regulador xa avisou, por sms e correo electrónico, aos titulares das explotacións con dereito a estas axudas. Ao igual que o ano pasado, deben ser os propios produtores, tanto as persoas físicas como as xurídicas, os que tramiten a solicitude de xeito electrónico na sede online da Xunta. 

A IXP impartiu esta mañá un seminario sobre os aspectos tecnolóxicos e culinarios da carne certificada, dirixido aos estudantes de 1º de Dirección de Cociña do CIFP Carlos Oroza de Pontevedra. Trátase da primeira de sete accións formativas, que se desenvolverán no mes de maio e nas que os alumnos poderán coñecer as cualidades dos diferentes alimentos galegos con IXP e DOP.

Na parte teórica desta masterclass, o director de Promoción, Luis Vázquez, expuxo as características diferenciais de Ternera Gallega; detallando o tipo de animais admitidos, as súas razas e orixe, a alimentación que reciben e as pautas de crianza tradicional que seguen os máis de 8.300 gandeiros inscritos na IXP. Tamén explicou o sistema de control que aplica o Consello Regulador desde as explotacións ata os puntos de venda, pasando por todas as fases da produción, para certificar a calidade da carne amparada e o seu correcto etiquetado e diferenciación no mercado. Un control que se basea no seguimento documental e na toma de mostras, asegurando a trazabilidade da carne mediante probas de ADN.

Con presencia en máis de 1200 puntos de venda, a campaña “Achégate a todo o bo de Galicia” celebra o vindeiro luns o seu cuarto sorteo, no que se repartirán 40 novos lotes de produtos galegos con IXP e DOP. Unha promoción que comezaba a principios de marzo, tanto nas carnicerías tradicionais como nos establecementos da gran distribución, e que rematará a mediados de maio.

Neste cuarto sorteo, poden participar os consumidores con tícket de compra de Ternera Gallega correspondente á segunda quincena deste mes de abril. Para inscribirse, teñen dúas vías: acceder directamente á web www.acercateatg.com ou escanear o código QR impreso na cartelaría distribuída nos puntos de venda, que os redirixirá a dita web para cubrir un sinxelo formulario.

Ternera Gallega segue apostando por unha forte presencia televisiva coa súa nova liña publicitaria e comunicativa, “Achégate a todo o bo de Galicia”. Desde principios de abril, a carne amparada pola IXP está protagonizando varios capítulos do programa de cociña Estache bo!, que emite a Televisión de Galicia cada tarde. 

Á fronte dos fogóns, Xoanqui Ameixeiras comparte receitas moi variadas con carne de Ternera Gallega, escollendo diferentes pezas e cociñados. Como prato de presentación, comezou cunha contundente costeleta marcada na grella e rematada no forno, que acompañou con allos tenros e patacas de luxe. No seguinte programa, o chef optou por unha babilla ou corte redondo como recheo dunha empanada de millo corvo. Tal e como indicaba Ameixeiras, sempre pensamos no peixe para unha empanada con este tipo de fariña, pero tamén podemos lograr un equilibrio perfecto cunha carne zumarenta como a de Ternera Gallega. 

Os novos gandeiros e gandeiras inscritos en Ternera Gallega ou en Vaca Galega / Boi Galego teñen ata o vindeiro 18 de maio para presentar a documentación necesaria para recibir as axudas aos gastos de marcaxe. Como xa ocorrera o ano pasado, son os propios produtores, tanto as persoas físicas como as xurídicas, os que deben realizar esta solicitude, a diferencia de ocasións anteriores cando o Consello Regulador realizaba os trámites necesarios para cada inscrito.

Poden beneficiarse destas achegas os titulares de explotacións que se incorporaran ás IXP despois do 18 de novembro do 2015 e que estean en activo. Cobren o 100% dos gastos subvencionables, sen superar os 3.000 euros anuais por explotación, e durante un período máximo de 5 anos.

O Consello Regulador mantén o seu programa de formación e de Responsabilidade Social Corporativa e, como fixo en anos anteriores, colaborou este venres co taller de emprego Vigo Capacita VI, no que impartiu un seminario teórico-práctico sobre Ternera Gallega. Neste obradoiro, fórmanse 20 alumnos para obter o certificado de profesionalidade na especialidade de Cociña ou de Servizos de Restaurante. 

Na parte teórica, o director de Promoción, Luís Vázquez, expuxo as cualidades diferenciais de Ternera Gallega e o labor do Consello Regulador. Explicou as razas admitidas na IXP, ademais da alimentación que reciben os tenreiros e os métodos tradicionais de crianza que seguen os máis de 8.300 gandeiros e gandeiras inscritos. Tamén detallou o sistema de control e trazabilidade da carne amparada; un punto no que subliñou especialmente a importancia do etiquetado para recoñecer e diferenciar Ternera Gallega.